karthikappsolution

ಸಕ್ಕರೆ, ಮೈದಾ, ಬಿಳಿ ಉಪ್ಪು, ಹಾಲು ಮತ್ತು ಪಾಲಿಶ್ ಮಾಡಿದ ಅಕ್ಕಿ, ಇಷ್ಟನ್ನೂ ಇಂದಿನ ವಿಜ್ಞಾನ ಐದು ಬಿಳಿ ವಿಷಗಳು (five white poisons)ಎಂದು ಕರೆದಿದೆ. ಆದರೆ ನಿಯಂತ್ರಣಗಳನ್ನೇನೂ ಹೇರಿಲ್ಲ. ಹೇರದೇ ಇರಲು ಕಾರಣ ಇವುಗಳನ್ನು ಅವಲಂಬಿಸಿರುವ ಉದ್ದಿಮೆಗಳು ಮತ್ತು ಇವುಗಳನ್ನು ಆಧರಿಸಿರುವ ಸರ್ಕಾರಗಳ ಮತ್ತು ದೊಡ್ಡ ಶಕ್ತಿಗಳ ಒತ್ತಡ. ಆದ್ದರಿಂದ ಎಲ್ಲಿಯವರೆಗೆ ಗ್ರಾಹಕರೇ ತಾವಾಗಿ ಇವುಗಳ ಒಲವನ್ನು ತ್ಯಜಿಸುವುದಿಲ್ಲವೋ ಅಲ್ಲಿಯವರೆಗೂ ಇವುಗಳು ಮುಂದುವರೆಯಲಿವೆ. ಇಂದಿನ ಲೇಖನದಲ್ಲಿ ಬಿಳಿ ಸಕ್ಕರೆಯ ಬದಲು ಬೆಲ್ಲವನ್ನು ಟೀ ಕಾಫಿಗಳಲ್ಲಿ ಸೇರಿಸಿಕೊಳ್ಳುವುದರ ಪ್ರಮುಖ ಪ್ರಯೋಜನಗಳನ್ನು ನೋಡೋಣ. ಬಿಳಿ ಸಕ್ಕರೆ ಅಥವಾ ಕಂದು ಬೆಲ್ಲ, ಎರಡೂ ಕಬ್ಬಿನಿಂದಲೇ ಮಾಡಲ್ಪಟ್ಟಿವೆಯಾದರೂ ಎರಡನ್ನೂ ತಯಾರಿಸುವ ವಿಧಾನಗಳಲ್ಲಿ ಭಾರೀ ವ್ಯತ್ಯಾಸವಿರುವ ಕಾರಣ ಕಬ್ಬಿನ ಹಾಲಿನಲ್ಲಿರುವ ಪೋಷಕಾಂಶಗಳು ಮತ್ತು ಇತರ ಗುಣಗಳು ಇಲ್ಲವಾಗುತ್ತವೆ ಹಾಗೂ ಕೇವಲ ಸಿಹಿ ಒಂದೇ ಉಳಿದುಕೊಳ್ಳುವುದರಿಂದಲೇ ನೋಡಲಿಕ್ಕೆ ಸುಂದರವಾದ ಬಿಳಿ ಸಕ್ಕರೆ ಬಿಳಿವಿಷದ ಪಟ್ಟಿಯಲ್ಲಿದೆ. ಅಲ್ಲದೇ ಇದನ್ನು ಬಿಳಿಯಾಗಿಸಲು ಸುಟ್ಟ ಮೂಳೆಗಳನ್ನೂ ಬಳಸುವ ಕಾರಣ ಇದನ್ನು ಸಸ್ಯಾಹಾರಿ ಅಲ್ಲ ಎನ್ನುವವರೂ ಇದ್ದಾರೆ. (bone char ಎಂಬ ಪದವನ್ನು ಗೂಗಲಿಸಿ ನೋಡಿ) ಆದರೆ ಬೆಲ್ಲ ಅಪ್ಪಟ ಸಾಂಪ್ರಾದಾಯಿಕ ವಿಧಾನದಲ್ಲಿ ತಯಾರಿಸಲ್ಪಟ್ಟ, ಯಾವುದೇ ಕೃತಕ ರಾಸಾಯನಿಕಗಳನ್ನು ಒಳಗೊಂಡಿರದ ಉತ್ಪನ್ನವಾಗಿದೆ. ಬನ್ನಿ, ಇದರ ಪ್ರಯೋಜನಗಳಲ್ಲಿ ಕೆಲವನ್ನು ನೋಡೋಣ: ಬೆಲ್ಲದ ಸೇವನೆಯಿಂದ ಜೀರ್ಣಾಂಗಗಳಲ್ಲಿ ಪ್ರಚೋದನೆ ದೊರಕುತ್ತದೆ ಹಾಗೂ ಕರುಳುಗಳಲ್ಲಿ ಜೀರ್ಣಗೊಂಡ ಅಹಾರದ ಚಲನೆ ಸುಲಭಗೊಳ್ಳುತ್ತದೆ. ಬೆಲ್ಲದ ಟೀ ಸೇವಿಸುವ ಮೂಲಕ ಜೀರ್ಣಾಂಗದ ಕಿಣ್ವಗಳು ಹೆಚ್ಚು ಕ್ರಿಯಾಶೀಲವಾಗುತ್ತವೆ ಹಾಗೂ ಜೀರ್ಣವ್ಯವಸ್ಥೆಯನ್ನುಉತ್ತಮಗೊಳಿಸಿ ಮಲಬದ್ದತೆಯಾಗದಂತೆ ತಡೆಯುತ್ತದೆ. ಬೆಲ್ಲದಲ್ಲಿ ಕಬ್ಬಿಣದ ಅಂಶ ಹೆಚ್ಚಾಗಿದ್ದು ರಕ್ತದ ಹೀಮೋಗ್ಲೋಬಿನ್ ಉತ್ಪಾದನೆಗೆ ನೆರವಾಗುತ್ತದೆ. ಬೆಲ್ಲವನ್ನು ನಿಮ್ಮ ನಿತ್ಯದ ಟೀ ಕಾಫಿಗಳಲ್ಲಿ ಬೆರೆಸಿಯೂ ಸೇವಿಸಬಹುದು ಅಥವಾ ಸಕ್ಕರೆ ಬಳಸುವ ಇತರ ಆಹಾರಗಳಲ್ಲಿ ಬೆರೆಸಿಯೂ ತಿನ್ನಬಹುದು. ದಿನದ ಕಬ್ಬಿಣದ ಅಗತ್ಯತೆಗೆ ಸುಮಾರು ಒಂದು ದೊಡ್ಡ ಚಮಚದಷ್ಟು ಬೆಲ್ಲ ಸಾಕಾಗುತ್ತದೆ. ಯಕೃತ್ ಮತ್ತು ಮೂತ್ರಪಿಂಡಗಳು ನಮ್ಮ ರಕ್ತವನ್ನು ಶೋಧಿಸಿ ಕಲ್ಮಗಳನ್ನು ನಿವಾರಿಸುವ ಶೋಧಕ ಅಂಗಗಳಾಗಿವೆ. ಇವುಗಳ ಕ್ಷಮತೆಯನ್ನು ಹೆಚ್ಚಿಸಲು ಬೆಲ್ಲ ನೆರವಾಗುತ್ತದೆ. ಹೌದು, ಕೊಂಚ ವಿಚಿತ್ರ ಎನಿಸಿದರೂ ಬೆಲ್ಲದ ಸೇವನೆಯಿಂದ ಯಕೃತ್ ಕಲ್ಮಶಗಳನ್ನು ನಿವಾರಿಸುವ ಕ್ಷಮತೆಯನ್ನು ಹೆಚ್ಚಿಸಿ ಕೊಳ್ಳುವುದನ್ನು ಗಮನಿಸಲಾಗಿದೆ. ಸಾಮಾನ್ಯ ಶೀತ, ಹೊಟ್ಟೆಯುಬ್ಬರಿಕೆ, ಚರ್ಮ ಒಣಗುವುದು ಮೊದಲಾದ ತೊಂದರೆಗಳು ಎದುರಾದಾಗ ಬೆಲ್ಲದ ತುಂಡೊಂದನ್ನು ತಿಂದು ಉಗುರುಬೆಚ್ಚಗಿನ ನೀರು ಕುಡಿದರೆ ಇದೇ ಪ್ರಥಮ ಚಿಕಿತ್ಸೆಯಾಗಿ ಸಾಕಾಗುತ್ತದೆ. ಬದಲಿಗೆ ನಿಮ್ಮ ಟೀಯಲ್ಲಿ ಒಂದು ತುಂಡು ಬೆಲ್ಲವನ್ನು ಬೆರೆಸಿಯೂ ಸೇವಿಸಬಹುದು. ಮಹಿಳೆಯರಿಗೆ ಮಾಸಿಕ ದಿನಗಳ ಬಳಿಕ ಮುನ್ನ ಎದುರಾಗುವ ಮಾನಸಿಕ ತೊಳಲಾಟಗಳು (PMS premenstrual syndrome) ಮನೋಭಾವದ ಏರುಪೇರಿಗೆ ಕಾರಣವಾಗುತ್ತವೆ. ಈ ದಿನಗಳು ಆಗಮಿಸುವ ಮುನ್ನಾ ದಿನಗಳಿಂದಲೇ ದಿನಕ್ಕೊಂದು ತುಂಡು ಬೆಲ್ಲವನ್ನು ಸೇವಿಸುತ್ತಾ ಬಂದರೆ ಈ ತೊಂದರೆಗಳನ್ನು ಆದಷ್ಟೂ ಮಟ್ಟಿಗೆ ಕಡಿಮೆಯಾಗುತ್ತವೆ. ಬೆಲ್ಲವನ್ನು ಸೇವಿಸಿದಾಗ ಇವು ದೇಹದಲ್ಲಿ ಎಂಡಾರ್ಫಿನ್ ಗಳು ಎಂಬ ರಸದೂತವನ್ನು ಹೆಚ್ಚಾಗಿ ಬಿಡುಗಡೆ ಮಾಡುತ್ತವೆ ಹಾಗೂ ಮಾಸಿಕ ದಿನಗಳು ಎದುರಾಗುವ ಮುನ್ನ ರಸದೂತಗಳ ಪ್ರಭಾವದಿಂದ ಎದುರಾಗುವ ಮಾನಸಿಕ ತೊಳಲಾಟವನ್ನು ಆದಷ್ಟೂ ಕಡಿಮೆಗೊಳಿಸುತ್ತವೆ. ಬಿಸಿಲಿನ ಧಗೆಯಲ್ಲಿ ನಡೆದು ಬಂದ ಬಳಿಕ ದಣಿವಾರಿಸಿಕೊಳ್ಳಲು ಒಂದು ತುಂಡು ಬೆಲ್ಲ ಮತ್ತು ತಣ್ಣೀರನ್ನು ಸೇವಿಸಿದರೆ ಬಿಸಿಲಿನ ಹೊಡೆತದಿಂದ ದೇಹವನ್ನು ರಕ್ಷಿಸಿಕೊಳ್ಳಬಹುದು. ಬೆಲ್ಲದ ಸೇವನೆಯಿಂದ ದೇಹದಲ್ಲಿ ಹೆಚ್ಚಿನ ಪ್ರಮಾಣದ ಎಲೆಕ್ಟ್ರೋಲೈಟುಗಳನ್ನು ಪಡೆಯಲು ಸಾಧ್ಯವಾಗುವುದೇ ಇದಕ್ಕೆ ಕಾರಣ. ಹಿಂದಿನ ದಿನಗಳಲ್ಲಿ ದಾರಿಯಲ್ಲಿ ನಡೆದು ಹೋಗುವವರಿಗಾಗಿ ಪ್ರತಿ ಮನೆಯ ಮುಂಭಾಗದಲ್ಲಿಯೂ ತಣ್ಣೀರಿನ ಮಡಕೆ ಮತ್ತು ಕೊಂಚ ಬೆಲ್ಲದ ತುಂಡುಗಳನ್ನು ಇರಿಸಲಾಗುತ್ತಿತ್ತು. ಇವನ್ನು ಸೇವಿಸಿದ ಜನರು ದಿನವಿಡೀ ನಡೆಯುತ್ತಾ ಹಲವಾರು ಮೈಲುಗಳನ್ನು ನಡೆದೇ ಕ್ರಮಿಸುತ್ತಿದ್ದರು. ಮೊದಲೇ ತಿಳಿಸಿದಂತೆ ಬೆಲ್ಲ ನೋಡಲಿಕ್ಕ ಅನಾಕರ್ಷಕ ಸಾಮಾಗ್ರಿಯಾಗಿದೆ. ಅಂದರೆ ಇದನ್ನು ನೋಡಲಿಕ್ಕೆ ಸುಂದರವಾಗಿಸಲು ಕೆಲವು ಉದ್ದಿಮೆಗಳು ಸುಣ್ಣ ಅಥವಾ ಬೇರಾವುದೋ ರಾಸಾಯನಿಕ ಗಳನ್ನು ಬೆರೆಸಬಹುದು. ಹಾಗಾಗಿ ನೋಡಲಿಕ್ಕೆ ಸುಂದರವಾಗಿ ಕಂಡಷ್ಟೂ ಬೆಲ್ಲ ಅನಾರೋಗ್ಯಕರ ಎಂದು ಅರ್ಥೈಸಿಕೊಳ್ಳಬೇಕು. ಉತ್ತಮ ಬೆಲ್ಲದ ಗುಣ ಎಂದರೆ ಇದು ಆದಷ್ಟೂ ಗಾಢ ಕಂದು ಬಣ್ಣದಲ್ಲಿರಬೇಕು (ಹಳದಿ ಇದ್ದಷ್ಟೂ ಒಳ್ಳೆಯದಲ್ಲ). ಅಲ್ಲದೇ ಸುಲಭವಾಗಿ ಬೆರಳುಗಳಿಂದ ಮುರಿಯಲು ಸಾಧ್ಯ ವಾಗುವಂತಿರಬೇಕು. ಎರಡು ಬೆರಳುಗಳ ನಡುವೆ ಹಿಚುಕಿದಾಗ ದಪ್ಪ ಕಣಗಳು ಉಳಿಯಬಾರದು. ಇತ್ತೀಚಿನ ದಿನಗಳಲ್ಲಿ ಬೆಲ್ಲದ ಪುಡಿ ಎಂಬ ಹೆಸರಿನಲ್ಲಿ ಸಕ್ಕರೆಗೇ ಬೆಲ್ಲವನ್ನು ಚೆನ್ನಾಗಿ ಬೆರೆಸಿ ಬೆಲ್ಲದ ರೂಪ ನೀಡಿ ದುಪ್ಪಟ್ಟು ಬೆಲೆಯಲ್ಲಿ ಮಾರುವುದು ಕಂಡುಬರುತ್ತಿದೆ. ಹಾಗಾಗಿ ಇದರಲ್ಲಿ ಸಕ್ಕರೆ ಬೆರೆತಿಲ್ಲವಷ್ಟೇ ಎಂದು ಖಚಿತಪಡಿಸಿಕೊಳ್ಳಬೇಕು. ರುಚಿಯೂ ಅಷ್ಟೇ, ನಾಲಿಗೆಗೆ ತಗುಲಿದ ತಕ್ಷಣವೇ ಇದು ಸಕ್ಕರೆಯಷ್ಟು ಸಿಹಿ ಇರಬಾರದು, ಬದಲಿಗೆ ಕೊಂಚವೇ ಹುಳಿಮಿಶ್ರಿತ ಸಿಹಿ ಇರಬೇಕು. ಈ ಗುಣಗಳಿರುವ ಬೆಲ್ಲ ಕೊಂಚ ದುಬಾರಿಯೇ ಇರಬಹುದು. … Read more